Ukraynada prezident seçkiləri keçiriləcək? | Moskvaya təzyiq güclənir - Baku TV

Almaniyanın xarici işlər naziri Yohann Vadeful Mərkəzi Asiya ölkələrini Rusiyaya qarşı tətbiq olunan sanksiyaların icrasını gücləndirməyə çağırıb və bütün tərəfdaşları Moskvanın Ukraynaya qarşı apardığı müharibəyə son qoymaq səylərini dəstəkləməyə səsləyib.

Nazir bildirib ki, Rusiyanın apardığı müharibəyə cavab olaraq Avropa İttifaqı genişmiqyaslı sanksiyalar tətbiq edib.

“Rusiyanı dəstəkləmək Avropa İttifaqının təhlükəsizlik maraqlarını birbaşa təhdid edir. Buna görə də Mərkəzi Asiya xarici işlər nazirlərindən Rusiyaya qarşı mübarizə aparmaq üçün səylərini artırmalarını və Avropa İttifaqı ilə sıx əlaqə saxlamalarını xahiş etdim”, – deyə Vadeful vurğulayıb.

Nazir həmçinin qeyd edib ki, Rusiyaya təzyiq davam etdirilməlidir və Ukraynaya dəstək gücləndirilməlidir. Onun sözlərinə görə, hazırda Rusiya sülhə nail olmaq üçün ciddi istək nümayiş etdirmir.

Ukraynada mümkün seçkilərlə bağlı suala cavab verən Vadeful bildirib ki, danışıqların nə vaxt və necə davam etdiriləcəyi Ukraynanın və Prezident Volodimir Zelenskinin suveren qərarıdır.

“Bu barədə şərh vermək istəmirəm”, – deyə nazir bildirib.

Qeyd edək ki, “Financial Times” qəzeti Volodimir Zelenskinin 24 fevral tarixində prezident seçkiləri və referendum planlarını elan edə biləcəyini yazıb.