Ukraynalı nazirdən Baku TV-yə açıqlama

Yarım ilə yaxındır Qərbin Ukraynaya silah tədarükünün kəskin azalmasına baxmayaraq, Ukraynanın müqaviməti davam etdirməsi, hətta Rusiya ərazisinə zərbələri artırması dünyanın diqqətini çəkib. Xüsusilə də Ukrayna ordusunda yeni dronların, digər yeni silahların peyda olması müzakirə mövzusudur.

Ukraynanın strateji sənaye naziri Oleksandr Kamışin bütün bunlar barədə mətbuata ilk açıqlamasını Baku TV-nin Şərqi Avropa bürosuna verib.

Nazir bildirib ki, Ukrayna demək olar bütün növlər üzrə silahların istehsalına başlayıb. “Bu gün Ukraynada müdafiə-sənaye kompleksi digər sənaye sahələri ilə müqayisədə daha sürətlə inkişaf edir. Bunlar, ilk növbədə, robot sistemləri – uçan aparatlar, yerüstü sistemlər, dəniz dronlarıdır. Bütün bunlar cəbhədə yaxşı nəticələr göstərir. Müharibə bitəndən sonra da ölkəmiz uzun illər onları istehsal edib ixrac edəcək. Çünki müharibə zamanı Ukraynada yaradılan “DefenseTech” məhsulları döyüş meydanında vəziyyəti kəskin dəyişən elementlərdir.

Əslində, Ukraynada 1 milyondan çox dron, eləcə də bir neçə min kilometr məsafəyə uçan yüzminlərlə pilotsuz təyyarə istehsalına imkan verən texnologiyalar yaradılıb. Bu, müharibəyə yenilik gətirmək və əvvəllər edə bilmədiyimiz zərbələri vurmaq üçün bir fürsətdir”, – O.Kamışin deyib.

Qeyd edək ki, Ukrayna son vaxtlar Rusiya ərazisinə yeni, mənbəyi bilinməyən silahlardan zərbələrin sayını artırıb.