“Vaqner”çilər Ermənistana gəlib? | İrəvan hərəkətə keçdi

Ermənistan İstintaq Komitəsi ölkədə “Vaqnerçi”lərin olmasına dair məlumatları araşdırır.

Qurumdan verilən xəbərdə bildirilib ki, İrəvan ölkə ərazisində 12000 “Vaqner” silahlı qruplaşmasının üzvünün varlığından ehtiyat edir, ona görə də hərəkətə keçib.

Məlumatda həmçinin vurğulanıb ki, araşdırma Milli Təhlükəsizlik Xidmətinin Baş İstintaq İdarəsində aparılır.

Qeyd edək ki, hələ 2023-cü ilin sentyabrında Ermənistanın Baş naziri Nikol Paşinyan parlamentdəki çıxışı zamanı bəyan edib ki, “Vaqnerçi”lərin Ermənistana gəlişi ilə bağlı xəbərlərdən Milli Təhlükəsizlik Xidməti məlumatlıdır.

“Ancaq bu xəbərlər real görsənmir. Bu informasiya daha çox şayiəyə bənzəyir”, – deyə o, çıxışında qeyd edib.

Maraqlı məqam ondan ibarətdir ki, ilk dəfə bu xəbərlər yayılanda silahlı qruplaşma üzvlərinin Ermənistandakı sayı 3000 göstərilirdi, indi isə bu rəqəm 12000 nəfərdir.

Məlumat üçün bildirək ki, sözügedən silahlı qruplaşma 2014-cü ildə yaradılıb. Yevgeniy Priqojinin başçılığı ilə fəaliyyət göstərən “Vaqnerçi”lər həm Rusiya-Ukrayna müharibəsi zamanı Baxmut uğrunda gedən döyüşlərdə fərqlənən, həm də ölkədə hərbi qiyam cəhdi ilə gündəmə gələn qrup kimi tanınır. 2023-cü ilin avqustunda isə “Vaqner” qrupunun rəhbəri Yevgeniy Priqojin və silahdaşları Tverdə baş verən təyyarə qəzasında həlak olub.