Vaşinqton narkokartellərə qarşı mübarizəni gücləndirir

ABŞ Prezidenti Donald Tramp Silahlı Qüvvələrin Latın Amerikasındakı narkotik kartellərinə qarşı mübarizənin bir hissəsi olaraq tezliklə yerüstü hədəflərə zərbələr endirməyə başlayacağını açıqlayıb.

Tramp bu barədə Dövlət Departamentində keçirilən təntənəli qəbulda çıxış edərkən bildirib.

Onun sözlərinə görə, Vaşinqton bu məsələdə çox sərt mövqe tutub və nəticədə, ABŞ-yə dəniz yolu ilə narkotik tədarükü 94 faiz azalıb.

"Biz eyni prosesi quruda da başlayacağıq. Çünki hər marşrutu, hər binanı, harada yaşadıqlarını bilirik. Biz onlar haqqında hər şeyi bilirik", – deyə o vurğulayıb.

Tramp son bir ildə ABŞ-də narkotik istifadəsi nəticəsində təxminən 300 min insanın öldüyünü açıqlayıb.

Analoji bəyanatla Pentaqon rəhbəri Pit Heqset də çıxış edib.

"Biz "Əl-Qaidə" ilə mübarizə apardığımız eyni incəlik və dəqiqliklə onlarla mübarizə aparırıq. Biz onları izləyirik, öldürürük və xalqımızı kimyəvi silahlara bərabər ölümcül təsirə malik narkotiklərlə zəhərlədikləri müddətcə onları məhv etməyə davam edəcəyik".