Vaşinqton Tehran barədə nə düşünür? | Danışıqların növbəti mərhələsi nə zaman olacaq? - Baku TV

İran hökuməti 48 saat ərzində nüvə sazişi ilə bağlı ətraflı təklif təqdim edərsə, ABŞ İranla danışıqların növbəti mərhələsini keçirməyə hazırdır.

Bu barədə “Axios” portalı yüksəkrütbəli amerikalı rəsmiyə istinadən məlumat yayıb.

“Əgər İran təkliflər layihəsini təqdim etsə, ABŞ ətraflı danışıqlara başlamaq və nüvə sazişi bağlaya biləcəyimizi görmək üçün fevralın 27-də Cenevrədə görüşməyə hazırdır”, – deyə portalın həmsöhbəti bildirib.

Digər mənbənin sözlərinə görə, görüşdə ABŞ və İran nüvə sazişi bağlanana qədər keçid dövrü üçün müvəqqəti razılaşmanı müzakirə edə bilər.

“Axios” portalı yazıb ki, fevralın 27-də Cenevrədə keçiriləcək danışıqlarda Donald Trampın xüsusi elçisi Stiv Uitkoff və kürəkəni Cared Kuşner iştirak edəcəklər.

Qeyd edək ki, fevralın 17-də Omanın vasitəçiliyi ilə İran və ABŞ arasında danışıqların ikinci mərhələsi olub. İranın xarici işlər naziri Abbas Əraqçi Tehran və Vaşinqtonun gələcək nüvə sazişinin bir neçə əsas bəndi üzrə razılığa gəldiyini bəyan edib. Ağ Evdən isə bildiriblər ki, bəzi məsələlərdə hələ də fikir ayrılıqları qalmaqdadır. Donald Tramp İrana saziş bağlamaq üçün 10-15 gün vaxt verib.