Volqoqradda həbsxanaya hücum edənlər zərərsizləşdirildi | Son vəziyyət açıqlandı

Rusiya Qvardiyasının xüsusi təyinatlıları Volqoqrad vilayətində koloniyada əməkdaşları girov götürən 4 məhbusu zərərsizləşdirib.

Bu barədə Rusiyanın kütləvi informasiya vasitələri məlumat yayıb.

“Rusiya Qvardiyasının Volqoqrad vilayətindəki xüsusi təyinatlı dəstəsinin snayperləri həbsxana əməkdaşlarını girov götürmüş 4 məhbusu 4 dəqiq atəşlə zərərsizləşdirib, girovlar azad edilib”, – deyə qurumun bəyanatında bildirilib.

“İnterfaks”ın məlumatına görə, cinayətkarların zərərsizləşdirilməsi zamanı Volqoqrad həbsxanasının 4 əməkdaşı da həlak olub.

Xatırladaq ki, Rusiyanın Volqoqrad vilayətində İK-19 ciddi rejimli islah koloniyasında bir neçə məhbus islah müəssisəsinin əməkdaşlarını girov götürmüşdü. Bir neçə nəfəri öldürən, yaralayan və girov götürən qiyamçılar Rusiyanın Moskva vilayətində "Crocus City Hall"a hücum edən terrorçuların "qisas"ını aldıqlarını bildiriblər. Onlar müxtəlif tələblər irəli sürüb, tanışlarının istintaq təcridxanasından buraxılmasını tələb edirdilər.