XİN liderləri nəyi müzakirə etdilər? - Baku TV

İranın xarici işlər naziri Abbas Əraqçi rusiyalı həmkarı Sergey Lavrovla telefonla danışıb.

Bu barədə İran Xarici İşlər Nazirliyi məlumat yayıb.

Məlumata görə, iranlı nazir Rusiya tərəfini İslamabadda ABŞ ilə aparılan danışıqlar barədə məlumatlandırıb. Telefon danışığı zamanı son regional hadisələr və Pakistanın paytaxtında İran və ABŞ nümayəndə heyətləri arasında məsləhətləşmələrin gedişatı müzakirə olunub. Bu arada, İslamabadda keçirilən danışıqlarda ABŞ İrandan uranın zənginləşdirilməsini 20 il müddətinə dondurmasını istəyib.

Bu barədə “Axios” portalı mənbələrə istinadən məlumat yayıb. Məlumata görə, Tehran bu təklifə uranın zənginləşdirilməsini 10 ildən az müddətə donduracaq əks təkliflə cavab verib.

ABŞ administrasiyasındakı mənbə tərəflərin razılığa gəlmək üçün danışıqları davam etdiklərini açıqlayıb.

Yeri gəlmişkən, İran və ABŞ arasında birbaşa danışıqların növbəti mərhələsinin keçiriləcəyi vaxt məlum olub. Bu barədə “The Atlantic” jurnalının müəllifi Araş Əzizi “X” hesabında məlumat yayıb. O qeyd edib ki, növbəti danışıqlar aprelin 16-da Pakistanın paytaxtı İslamabadda keçiriləcək. Məlumatın Tehrandakı mənbəyə istinadən yayıldığı bildirilir.