Yadplanetlilər iki uşaq anasına hücum etdi? - Məşhur şirkət məhkəməyə verildi

“Netflix” Nyu-Yorkdan olan Linda Napolitanonun qəribə hekayəsindən bəhs edən sənədli serial çəkib.

77 yaşlı L.Napolitano “Netflix”i yeni sənədli filmə görə məhkəməyə verib.

1989-cu il noyabrın 30-da evdar qadın və iki uşaq anası olan L.Napolitano yadplanetlilər tərəfindən qaçırıldığını deyir.

O, Manhettenin aşağı hissəsində 12-ci mərtəbədəki mənzilinin pəncərəsindən Bruklin körpüsünə, oradan da kosmik gəmiyə aparıldığını iddia edir. O, hekayəsini 2011-ci ildə vəfat edən UFO tədqiqatçısı Budd Hopkinsə danışıb.

1996-cı ildə B.Hopkins “Witness: The True Story of the Brooklyn Bridge” adlı kitabında bu hadisədən bəhs edib. İddia edilən hadisədən bir neçə il sonra L.Napolitano bildirib ki, yadplanetlilər qayıdıb ailəsinə hücum edib.

Maraqlıdır ki, filmdə 23 nəfər L.Napolitanonun Manhetten üstündən uçduğunun şahidi olduğunu iddia edir. L.Napolitano həmçinin yadplanetlilərin onu izləmək üçün burnuna taxılmış metal cihazın rentgen şəklini də göstərib.

Onun oğlu Conni ailəsinin yad varlıqların hücumuna məruz qalması hekayəsini təsdiqləyib.

“Mən sadəcə onu həyatımdan silməyə çalışıram. Bu, çoxdan baş verib. Qonaq otağında üç “məxluq” gördüm. Anam bu hadisəni uydurmayıb, hər şey doğrudan da baş verib”, – o, jurnalistlərə bildirib.

Lakin film üçün danışan Conninin keçmiş arvadı Kerol Reyni ərinin və qayınanasının hekayələrinin doğruluğuna şübhə ilə yanaşıb, olanları uydurma adlandırıb.