Yanğınla bağlı yeni faktlar ortaya çıxıb | Honkonq

Honkonq Yanğın Xidməti noyabrın 28-i səhər saatlarında "Wang Fuk Court" yaşayış kompleksində yanğınsöndürmə əməliyyatlarının başa çatdığını elan edib.

Məlumata görə, xilasetmə qrupları zərər görən bütün binalarda hərtərəfli axtarış aparır ki, içəridə başqa heç kimin qalmadığına əmin olsunlar. Xilasetmə işlərinə ümumilikdə 117 yanğınsöndürmə maşını cəlb olunub.

Təxminən 4 min sakini olan yaşayış kompleksinə aid 8 bina təmir işlərinə görə yaşıl tor və konstruksiya ilə əhatə olunmuşdu. Yanğın da elə binalardan birinin xaricindəki konstruksiyadan başlayıb və digər binalara yayılıb.

Polis araşdırması binaları örtən alışqan materialların yanğının sürətlə yayılmasına səbəb ola biləcəyini müəyyən etdiyinə görə təmir işlərinə cavabdeh olan üç nəfər ehtiyatsızlıqdan adam öldürmək şübhəsi ilə saxlanılıb.

Bildirilib ki, hökumət yanğından zərər çəkmiş hər bir ev təsərrüfatına 10 min Honqkonq dolları, yəni təxminən 2100 manat həcmində birdəfəlik maddi yardım ayırır.

Həmçinin yanğında həlak olanların anım və zərərçəkənlərə dəstək tədbirləri də nəzərdə tutulub. Hökumət bütün bayram tədbirlərini ləğv edəcək və dövlət rəsmiləri zəruri hesab edilməyən ictimai tədbirlərdə iştirakdan çəkinəcəklər.

Xatırladaq ki, fəlakətli yanğında ölənlərin sayı 120 nəfəri ötüb.