Yaraları sağaltmağın yeni üsulu

Finlandiyalı alimlərin irəli sürdüyü yeni üsul sayəsində şam ağacı qətranı yaraların sağalmasına kömək edir.

Şərqi Finlandiya Universitetində aparılan araşdırmaya görə, qətranın tərkibində olan pinorezinol iltihabı azaldır və dəri hüceyrələrinin bərpasını stimullaşdırır.

Tədqiqatçı Elias Haapakorvanın sözlərinə görə, qətranların antimikrob xüsusiyyətləri çoxdan məlumdur, lakin yeni tədqiqat göstərir ki, o, yalnız antimikrob təsiri deyil, həm də iltihabın azaldılması və dərinin bərpasının sürətləndirilməsi də daxil olmaqla, digər mexanizmlər sayəsində yaraların sağalmasına kömək edir.

Tədqiqat zamanı həmçinin güclü antimikrob aktivliyi nümayiş etdirən qətran birləşmələrinə əsaslanan yağ-su emulsiyası hazırlanıb.

Alimlər vurğulayırlar ki, bitki mənşəli müalicələrə marağın artması antibiotik rezistentliyinin yayılması fonunda müşahidə olunur. Şam ağacı qətranı əsrlər boyu Şimali Avropa ölkələrində xalq təbabətində istifadə edilib.

E.Haapakorvanın fikrincə, əldə edilən nəticələrə baxmayaraq, mövzu hələ də az öyrənilmiş qalır və əlavə tədqiqatlar tələb edir.