Yayladağı sərhəd-keçid məntəqəsi açılacaq? | Əli Yerlikaya statistikadan danışdı

“2024-cü ildə ayda orta hesabla 11 minə yaxın suriyalı könüllü olaraq təhlükəsiz şəkildə vətəninə geri qayıdırdı. Gün ərzində 300-350 geri dönüş var idi. Bu gün isə sıxlıq daha çoxdur. Bu gün günorta saatlarına kimi keçiş 700-ə yaxın olub”.

Bunu Türkiyə daxili işlər naziri Ali Yerlikaya jurnalistlərə açıqlamasında deyib.

“Daha əvvəl sərhəd-keçid məntəqəsindən geri qayıdanlar üçün gündəlik limit 3 000-ə yaxın idi. Gündə 300-350 nəfər keçdiyi üçün bu limit kifayət edirdi. Lakin geri qayıdanların sayının artdığını nəzərə alaraq bu limiti 15-20 minə çatdırmışıq”, – nazir qeyd edib.

A.Yerlikaya eyni zamanda vurğulayıb ki, yaxın müddətdə Prezident Rəcəb Tayyib Ərdoğan “Yayladağı” sərhəd-keçid məntəqəsinin açılacağını elan edəcək.

Nazir əlavə edib ki, 2016-cı ildən bu günə kimi 737 min suriyalı vətənlərinə təhlükəsiz şəkildə geri qayıdıb:

“Hazırda Türkiyədə müvəqqəti qoruma altında olan suriyalıların sayı 2 milyon 936 min nəfərdir”.

Qeyd edək ki, bir müddət əvvəl Suriyada müxaliflər paytaxt Dəməşqi ələ keçirərək Bəşər Əsəd rejiminin devrildiyini elan edib. Bundan sonra Türkiyədəki suriyalı qaçqınların vətənlərinə qayıtması sürətlənib.