Yenidən gündəmə gətirilən qanun layihəsinə Aİ və BMT-dən reaksiya

“Gürcüstanda hakim partiyanın “Xarici təsirin şəffaflığı haqqında” qanun layihəsini yenidən gündəmə gətirəcəyi barədə açıqlaması ciddi narahatlıq doğurur”.

Bu barədə Avropa İttifaqının Mətbuat Xidmətinin məlumatında bildirilib.

Aİ Gürcüstanı demokratiya, qanunun aliliyi və insan haqlarının təşviqi ilə bağlı öhdəliyi qorumağa çağırıb.

Aİ xatırladıb ki, komissiyanın 8 noyabr 2023-cü il tarixli tövsiyəsində göstərilən müvafiq addımlar atıldığına görə Avropa Şurası Gürcüstana namizəd statusu verib.

BMT-nin İnsan Haqları ofisi də Gürcüstan hökumətini adıçəkilən qanun layihəsini qəbul etməməyə çağırıb. Bu barədə təşkilatın “X” platformasındakı paylaşımında məlumat yer alıb.

“Biz Gürcüstan rəsmilərini maliyyəsinin 20%-dən çoxunu xaricdən qəbul edən vətəndaş cəmiyyəti təşkilatları və media orqanlarını “xarici qüvvələrin maraqları əsasında fəaliyyət göstərən təşkilatlar” kimi damğalayacaq bu qanun layihəsini geri çəkməyə çağırırıq. Bu, söz və birləşmək azadlığına ciddi təhdid törədir”, – deyə bəyanatda bildirilib.