Zelenski prezident seçkilərinə hazır olduğunu bildirib

Rusiya ilə müharibədə yeni mərhələ başlayıb.

Bunu “Associated Press” agentliyinə açıqlamasında Ukrayna Prezidenti Volodimir Zelenski deyib.

Onun sözlərinə görə, qış Ukrayna Silahlı Qüvvələrinin yaydakı əks-hücumundan sonra hərbi əməliyyatları çətinləşdirəcək:

“Biz daha sürətli nəticələr istəyirdik. Bu baxımdan, təəssüf ki, istədiyimizə nail ola bilməmişik. Ukrayna müttəfiqlərindən bütün lazımi silahları almadı və hərbi gücün həcminə qoyulan məhdudiyyətlər irəliləyişə mane oldu. Ukraynada müharibə yeni mərhələyə qədəm qoyub. Ümumiyyətlə, qış müharibənin yeni mərhələsidir. Silah və quru qoşunlarının çatışmazlığı səbəbindən yay əks-hücumları gözlənilən nəticəni vermədi. Bu da qış hərbi əməliyyatlarını çətinləşdirə bilər. Lakin Ukrayna təslim olmayacaq”.

Volodimir Zelenski Ukraynada prezident seçkilərinin keçirilməsinə hazır olduğunu da bildirib.

O xatırladıb ki, 2024-cü il üçün nəzərdə tutulan seçkilər ləğv olunub: “Döyüşlər bunu qeyri-mümkün edib. Ukraynalıların əksəriyyəti düşünür ki, belə şəraitdə səsvermənin keçirilməsi təhlükəli və mənasızdır. Hazırda mənim işim çox çətindir. Amma postumu tərk etməyim ədalətsizlik və yanlış olar”.

Qeyd edək ki, Ukrayna Ali Radası 2024-cü ildə prezident seçkilərinin təxirə salınması ilə bağlı qərar qəbul edib.