Zelenski Sinqapurda ABŞ-nin müdafiə naziri ilə görüşdü

Ukrayna Prezidenti Volodimir Zelenski Sinqapurda keçirilən “Şanqri-La Dialoq” beynəlxalq təhlükəsizlik forumu çərçivəsində ABŞ-nin müdafiə naziri Lloyd Ostin ilə görüşüb.

Bu barədə V.Zelenski “Telegram” kanalında yazıb.

“ABŞ-nin müdafiə naziri Lloyd Ostin ilə görüşdə əsas müzakirə mövzusu Ukraynanın müdafiə ehtiyacları, hava hücumundan müdafiə sisteminin gücləndirilməsi, “F-16” təyyarələrinin tədarükü, ikitərəfli təhlükəsizlik sazişinin hazırlanması olub”, – deyə dövlət başçısı bildirib.

O, danışıqların təfərrüatlarını açıqlamayıb. V.Zelenski həmçinin ABŞ Prezidenti Co Baydenə Rusiya ərazisinə Amerika silahları ilə müdafiə zərbələri endirmək qərarına görə təşəkkür edib.

Mayın 30-da Pentaqon təsdiq edib ki, ABŞ administrasiyası əks batareya döyüşü zamanı Rusiya ərazisinə Amerika silahları ilə zərbələr endirməyə razılaşıb.