Astarada torpaq sürüşməsi | Yolun bir hissəsi çökdü - Baku TV

Astara rayonunun Vaqo kəndində torpaq sürüşməsi baş verib.

Pensərçayın Vaqo kəndindən keçən hissəsində qurulan beton bəndlər torpaq qatı ilə birlikdə dağılaraq çaya tökülüb. Nəticədə, kənddaxili yolun bir hissəsi ikiyə bölünüb.

“Beton panellər uzun illərdir ki, qoyulub. Ekskavator torpağı qazdı, hadisə də buna görə baş verdi”, – sakinlərdən biri söyləyib.

Astara Su Meliorasiya Sistemlərinin İstismarı İdarəsindən verilən məlumata görə, sürüşmə səhər saat 07:20 radələrində qeydə alınıb:

“Çayda su sərfiyyatı güclü olmadığı üçün sel təhlükəsi yoxdur. Lakin torpaq eroziyaya uğrayıb və nəticədə, 1972-ci ildə tikilmiş bəndlərdən 17-si çaya aşıb. Digər 5 bəndə isə ciddi ziyan dəyib. Astara Su Meliorasiya Sistemlərinin İstismarı İdarəsinin mütəxəssisləri dərhal əraziyə cəlb olunub. Hazırda İdarəyə məxsus ekskavator vasitəsilə çayın məcrası dəyişdirilir ki, həmin əraziyə daxil olub bəndlərin ətrafı təmizlənsin və görülən tədbirlər nəticəsində təhlükənin qarşısı alınsın”.

Qeyd edək ki, ərazidə təhlükəsizlik tədbirləri gücləndirilib və vəziyyət ciddi nəzarət altındadır.