Azərbaycanda həbs olunan fransalının şikayəti ilə bağlı hansı qərar verildi? - Baku TV

Bakı Apellyasiya Məhkəməsində külli miqdarda rüşvət alma və digər cinayət əməllərində ittiham olunan Fransanın "SAUR" şirkətinin vitse-prezidenti Anas Derasın apellyasiya şikayətinə baxılıb və onun cəzası 3 il azaldılıb.

Qeyd edək ki, Bakı Ağır Cinayətlər Məhkəməsinin hökmünə əsasən, o, 12 il müddətinə azadlıqdan məhrum edilmişdi.

İttihama görə, Dövlət Təhlükəsizlik Xidməti tərəfindən istintaqı aparılan cinayət işi üzrə Fransa Prezidentinin mühafizə xidmətinin sabiq rəhbəri Aleksandr Benalla və Fransanın milyardlarla dövriyyəsi olan "SAUR" şirkətinin vitse-prezidenti Anas Deras 2018-ci ildə azərbaycanəsilli rusiyalı milyarder Fərhad Əhmədovun aktivlərinə qarşı tətbiq olunan beynəlxalq sanksiyaların ləğvi müqabilində külli miqdarda rüşvət alma və digər cinayət əməllərində ittiham olunurlar.

Qeyd edilir ki, adıçəkilən şəxslər Fərhad Əhmədovdan rüşvət tələb ediblər və bunun müqabilində sonuncunun dəbdəbəli "Luna" yaxtasının beynəlxalq həbsdən azad ediləcəyini, özünün isə sanksiyalardan qorunacağını vəd ediblər.

Məlumatlara əsasən, Fərhad Əhmədov milyonlarla dollarlıq rüşvətin bir hissəsini Anas Deras və Aleksandr Benallanın hesabına köçürüb.

Anas Derasa Cinayət Məcəlləsinin 193-1.3.2-ci (cinayət yolu ilə əldə edilmiş əmlakı leqallaşdırma xeyli miqdarda törədildikdə) və 32.5, 311.3.3-cü (rüşvət alma, passiv rüşvətxorluq külli miqdarda törədildikdə) maddələri ilə ittiham elan olunub.

Aleksandr Benallanın isə beynəlxalq axtarışa verilməsi ilə bağlı "Interpol"a müraciət olunub.