Bakı sakini eyni əməldən 7-ci də həbs edildi | Məhkəmə qərarını açıqladı

Əvvəllər Cinayət Məcəlləsinin 234.1 – satış məqsədi olmadan narkotik maddələrin qanunsuz saxlanılması və daşınması maddəsi ilə 6 dəfə məhkum olunan paytaxt sakini Çingiz Kərimovun növbəti cinayət işinin məhkəmə istintaqı başa çatıb.

Bakı Ağır Cinayətlər Məhkəməsinin hakimi Əli Məmmədovun sədrliyi ilə keçirilən prosesdə prokuror Eldar Həmzə təqsirləndirilən Çingiz Kərimov haqqında irəli sürülmüş ittihamın məhkəmə istintaqı zamanı tam sübuta yetirildiyini qeyd edərək məhkəmədən onun 7-ci dəfə azadlıqdan məhrum edilməsini istəyib.

Hakim təqsirləndirilən Çingiz Kərimovun eyni residiv əməllərə görə 6 dəfə məhkum olmasını onunla bağlı irəli sürülən ittihamda ağırlaşdırıcı hal kimi qiymətləndirərək bu dəfə onun barəsində daha sərt qərar çıxarıb.

Qeyd edək ki, Çingiz Kərimov ilk dəfə Xəzər Rayon Məhkəməsinin hökmü ilə 9 ay şərti, Abşeron Rayon Məhkəməsinin hökmü ilə 2 il, üç dəfə Nizami Rayon Məhkəməsinin hökmü ilə 2 il 6 ay, 1 il 5 ay və 2 il, sonuncu dəfə, yəni 6-cı dəfə isə yenidən Xəzər Rayon Məhkəməsinin qərarı ilə 2 il azadlıqdan məhrum edilib. Onun bütün məhkumluqları Cinayət Məcəlləsinin eyni maddəsi ilə olub.