İllərlə davam edən mübahisə | "Dedi ki, torpaq alıb icarəyə verək" - 114 minlik fırıldaq iddiası

Uzun illər dostluq münasibətində olduğu şəxsə güvənən Günel Niftəliyeva 114 min manatını geri ala bilmədiyini deyir.

Şikayətçinin iddiasına görə, Nərminə Adıyeva ona torpaq almağı vəd edərək pul alıb. Vəd edilən torpaq və vəsaitin geri qaytarılması ilə bağlı mübahisə isə 2024-cü ildən davam edir.

“Uzun illər dostluq münasibətində olduğum üçün ona çox güvənirdim. Həmişə məndən pul götürürdü. Bir gün mənə Ağsu rayonunda ucuz torpaq sahələrinin olduğunu, onları alıb icarəyə verməklə gəlir əldə edə biləcəyimizi dedi. Əvvəlcə 51 min manat, daha sonra isə torpağın hasarlanması üçün 24 min manat verdim. Pulun verilməsini təsdiqləyən əlyazma və imzalar, həmçinin qarşı tərəfin videoya çəkilmiş etirafları da var”, – deyə Günel Niftəliyeva bildirib.

Şikayətçinin sözlərinə görə, sonradan Nərminə Adıyeva şəxsi problemlərlə əlaqədar ondan yenidən kömək istəyib. O iddia edir ki, qarşı tərəf keçmiş nişanlısının onların görüşlərini videoya çəkdiyini və görüntüləri həyat yoldaşına göndərməklə hədələdiyini bildirib.

Baku TV məsələ ilə bağlı Nərminə Adıyeva ilə də əlaqə saxlayıb. O, şikayətçinin hüquq-mühafizə orqanlarına müraciət edə biləcəyini deyib. Nərminə Adıyeva həmçinin qarşı tərəfin onu şantaj etdiyini iddia edib.