Bakıda kişi həyat yoldaşını parkda qətlə yetirib | Cinayətin yeni təfərrüatları

Bakıda həyat yoldaşını parkda bıçaqlayaraq qətlə yetirməkdə təqsirləndirilən Natiq Məhərrəmovun cinayət işi üzrə məhkəmə prosesi işini davam etdirib.

Bakı Ağır Cinayətlər Məhkəməsində hakim Telman Hüseynovun sədrliyi ilə keçirilən iclasda şahid ifadəsi dinlənilib.

Təqsirləndirilənin anası ifadəsində bildirib ki, oğlunun ailəsində əvvəllər tez-tez münaqişələr olub. İki dostunun adını çəkərək onlardan birinin oğlunun evinə mütəmadi gəldiyini və bunun ailədə söz-söhbətlərə gətirib çıxardığını deyib.

Hadisənin canlı şahidi 17 yaşlı yeniyetmə ifadəsi zamanı bildirib ki, parkda dostu ilə oturduğu zaman "kömək edin!" deyə kiminsə qışqırdığını eşidib. Səs gələn tərəfə baxanda görüb ki, qadın yerdə uzanıb və kişi bıçaqla onun qoluna zərbə vurub. Daha sonra hadisə yerinə təcili tibbi yardım maşını gəlib.

Məhkəmənin növbəti iclası noyabrın 26-na təyin olunub.

İttiham aktına əsasən, 35 yaşlı Natiq Məhərrəmov Suraxanı rayonu, Qaraçuxur qəsəbəsində həyat yoldaşı, 39 yaşlı Sevinc Məhərrəmovanı bıçaqlayaraq qətlə yetirib. Ona qarşı Cinayət Məcəlləsinin bir neçə ağır maddəsi ilə ittiham irəli sürülüb.