Bakıda mərhum Xalq artistinin oğlunu döydülər - Baku TV

Azərbaycanın mərhum Xalq artisti Yuri Balıyevin 45 yaşlı oğlu Artur Balıyev yanvarın 30-da axşam saatlarında paytaxtın Binəqədi rayonu, Əcəmi Naxçıvani küçəsində döyülüb.

O, hazırda xəstəxanaya yerləşdirilib və vəziyyəti ağır qiymətləndirilir.

Artur Balıyev hadisə ilə bağlı verdiyi açıqlamada bildirib ki, dünən axşam saat təxminən 18:30 radələrində naməlum şəxs ona zəng edərək anasına məxsus maşının onun avtomobilini sürtdüyünü deyib.

O, anasına məxsus avtomobilin uzun müddətdir idarə olunmadığını bildirsə də, qarşı tərəf israr edib və Artur Balıyevdən hadisə yerinə gəlməsini istəyib:

“Deyilən ünvana getdim. Sürtünmə yerlərinə baxıb bildirdim ki, həmin hissələr bir-birinə uyğun gəlmir, qarşı tərəfin maşınındakı cızıq xeyli yuxarıda idi. Amma onlar mənimlə razılaşmadılar”.

Artur Balıyevin sözlərinə görə, hadisə yerində dörd nəfər olub və mübahisə zamanı həmin şəxslər ona fiziki təzyiq göstərməyə başlayıblar:

“Hərə bir tərəfdən vurmağa başladı, mən də yerə yıxıldım. Qan töküləndən sonra qaçdılar. Ayağa qalxmaq istədim, amma dura bilmədim”.

Faktla bağlı Daxili İşlər Nazirliyindən bildirilib ki, hadisə ilə əlaqədar ərazi Polis Şöbəsində araşdırma aparılır. Artur Balıyevin izahatı alınıb. Aralarında yaranmış mübahisə zamanı ona xəsarət yetirməkdə şübhəli bilinən Turxan Zeynalov polis əməkdaşları tərəfindən saxlanılıb.