Bakıda qandonduran hadisə | Qardaşının evinə qumbara atan şəxsə ağır cəza

Bakı Apellyasiya Məhkəməsində qardaşını qumbara ilə öldürməyə cəhddə təqsirləndirilən Ramin İsakov barəsindəki hökmdən verilən apellyasiya şikayəti üzrə məhkəmə iclası başa çatıb.

Hakim Habil Məmmədovun sədrliyi ilə keçirilən prosesdə qərar elan olunub. Qərara əsasən, onun şikayəti təmin edilməyib.

Hadisə 2022-ci il iyul ayının 8-də paytaxtın Sabunçu rayonunda baş verib. Ramin İsakov şəxsi münasibətlər zəminində aralarında yaranan mübahisə zamanı qardaşı Rəşad İsakzadənin Maştağada yerləşən evinin həyətinə qumbara atıb. Evdə Rəşad İsakzadədən əlavə onun azyaşlı iki uşağı və həyat yoldaşı olub. Xoşbəxtlikdən xəsarət alan olmayıb.

Faktla bağlı Ramin İsakov barəsində Cinayət Məcəlləsinin 29, 120.2.4, 120.2.7, 186.2.2 və 228.1-ci maddələri (iki və daha çox şəxsi öldürməyə cəhd, xüsusi amansızlıqla adam öldürməyə cəhd, əmlakı məhv etməyə cəhd, qanunsuz silah saxlama) ilə iş açılıb.

Məhkəmə-narkoloji ekspertizasının rəyinə görə, müayinə zamanı Ramin İsakovda narkotik vasitələrin qəbulu nəticəsində asılılıq sindromu yaranıb.

Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssisəsində çəkməklə Ramin İsakov 14 il 6 ay müddətinə azadlıqdan məhrum olunub.