Bakıda silahlı atışmanın təfərrüatı

Bakıda növbəti silahlı insident olub.

Hadisə paytaxtın Səməd Vurğun küçəsində, Bakı Dövlət Sirkinin yaxınlığında qeydə alınıb. İnsident zamanı silahlı şəxs və ya şəxslər iki nəfəri güllələyib.

Daxili İşlər Nazirliyi faktı təsdiqləyib. Bildirilib ki, paytaxtın Nəsimi rayonunda iki nəfərin odlu silahdan açılan atəşdən yaralanması ilə bağlı polisə məlumat daxil olub. Hadisə yerinə əməliyyat qrupu cəlb edilib.

Araşdırma zamanı müəyyən edilib ki, hadisədə iki nəfər xəsarət alıb. Onlar 21 yaşlı Fəqan Rəhimli, 40 yaşlı Tamerlan Hüseynovdur. Yaralılar TƏBİB-in tabeliyindəki Kliniki Tibbi Mərkəzin Təcili tibbi yardım şöbəsinə yerləşdirilib.

DİN-dən verilən məlumata görə, polis əməkdaşları tərəfindən keçirilən əməliyyatla hadisəni törətməkdə şübhəli bilinən bir nəfər saxlanılıb. Faktla bağlı araşdırma aparılır.