Bir milyon manata yaxın məbləği leqallaşdıran Rusiya vətəndaşı həbs olundu - Baku TV

Banklardan birindən cinayət yolu ilə 727 min manatdan çox pul vəsaitini qanunsuz leqallaşdırmaqda təqsirləndirilən Rusiya vətəndaşı Vaysero Aleksandr Vladimiroviçin məhkəməsi yekunlaşıb.

Bakı Ağır Cinayətlər Məhkəməsinin hakimi Namiq Kərimovun sədrliyi ilə keçirilən prosesdə dövlət ittihamçısı Tural Yaqubov təqsirləndirilən əcnəbinin 5 il müddətinə azadlıqdan məhrum edilməsini məhkəməyə təklif edib. Müşavirədən sonra hökm oxunaraq o, 4 il müddətinə azadlıqdan məhrum edilib.

İstintaq zamanı müəyyən edilib ki, Vaysero Aleksandr tamah niyyəti ilə qabaqcadan əlbir olan bir qrup şəxs halında cinayət yolu ilə əldə edilən xeyli miqdarda əmlakı legallaşdırıb.

Belə ki, Rusiya Federasiyasının vətəndaşı ölkə hüdudlarından kənarda yaradılan və qanunsuz fəaliyyət göstərən mərc, loto va digər qumar saytlarından daxil olan pul vəsaitlərinin həqiqi mənbəyini gizlədərək, həmin pul vəsaitlərini müxtəlif şəxslərin adına olan bank kartlarına hissə-hissə köçürməklə ümumilikdə 727 min manatdan çox vasati qanunsuz legallaşdırıb.

Qeyd edək ki, o, Daxili İşlər Nazirliyinin (DİN) Kibercinayətkatlıqla Mübarizə Baş İdarəsi tərəfindən saxlanılaraq istintaqa cəlb edilib. Toplanmış sübutlar əsasında Vaysero Aleksandr Vladimiroviçə Cinayət Məcəlləsinin 193-1.3.2 (cinayət yolu ilə qazanılmış əmlakı leqallaşdırma) maddəsi ilə yekun ittiham verilib.