Dəhşətli cinayət | Qətlə yetirilən şəxsin meyiti başqa rayondan tapıldı - Baku TV

Bir neçə gün əvvəl Qusar rayonunun Əvəcuğ kəndi yaxınlığındakı meşəlik ərazidə 50 yaşlı Səadət Həsənovanın meyitinin tapılması ilə bağlı bəzi təfərrüatlar məlum olub.

Yayılan məlumatlarda qadının qeyri-rəsmi münasibətdə olduğu 27 yaşlı Kamran Seyidov tərəfindən qətlə yetirildiyi bildirilsə də, bu iddia Səadət Həsənovanın ailə üzvləri və övladları tərəfindən təkzib edilib.

Qadının qardaşının sözlərinə görə, Səadət Həsənova Bakıda restoranların birində aşpaz işləyib. Kamran Seyidov da həmin restoranda çalışıb və onların tanışlığı iş yerindən başlayıb. Onun sözlərinə görə, aralarında qeyri-rəsmi münasibət olmayıb.

Qardaşının iddiasına əsasən, hadisə günü Səadət Həsənova işdən evə gedərkən Kamran Seyidov ona arxadan yaxınlaşaraq bıçaqla ürək nahiyəsindən xəsarət yetirib. Daha sonra qadının meyiti Qusar rayonundakı meşəlik əraziyə aparılaraq oraya atılıb.

Qadının qardaşı cinayətin tamah məqsədilə törədildiyini də iddia edib. Onun sözlərinə görə, Səadət Həsənovanın boynunda olan təxminən 70 qramlıq qızıl boyunbağı da götürülüb.

Məlumata görə, Kamran Seyidov 2024-cü ildə təyyarə qəzasında həyatını itirən qusarlı Xədicə və Əli Əlimirzəyevin ögey qardaşıdır.

Qadının qardaşı iddia edir ki, K.Seyidov onların ölümündən sonra özünü birinci dərəcəli varis kimi təqdim edərək kompensasiya tələb edib.

Cinayəti törətməkdə şübhəli bilinən 27 yaşlı Kamran Seyidov polis əməkdaşları tərəfindən saxlanılıb. Faktla bağlı araşdırma aparılır.