"Camaatın 90 %-i kələm əkir" | Qusarda fermerlərin kələmin satış qiymətlərindən narazılığı - Baku TV

Ötən illə müqayisədə bu il kələmin qiymətinin aşağı olması fermerləri ziyana salıb. Qusar rayonunun Düztahir kənd sakinləri dolanışıqlarını əsasən bu məhsulun satışından əldə etdikləri gəlirlə təmin etdiklərini bildirirlər. Hazırda kələmin qiymətinin kəskin ucuzlaşması fermerlərin qazanc ümidlərini puça çıxarıb.

Fermerlər narazılıqlarını Baku TV ilə bölüşüblər.

“Camaatın 90 faizi kələm əkir. Hamının məhsulu var, ancaq qiymət sıfırdır. Ötən il bir az yaxşı idi. Hazırda kələmin qiyməti 20 qəpikdir, heç maya dəyərini də ödəmir”, – onlardan biri söyləyib.

Digər bir fermer isə vurğulayıb:

“Bu il qiymətlər ürəkaçan olmadı. 20 qəpikdən satanda camaatın çəkdiyi zəhmətə dəymir. Tələbat var, amma məhsul çox əkildiyinə görə qiymət aşağıdır. Bu bizi qane etmir. Keçən il qiymətlər 30-35 qəpik arasında dəyişirdi. Bir hektardan 10 min manat gəlir götürürdüksə, hazırkı vəziyyətdə zərərlə işləyirik”.