Əli ətçəkən maşında qalan uşaq üçün 8 saatlıq mübarizə | Gəncədə dəhşət - Baku TV

Gəncədə 3 yaşlı uşaq bədbəxt hadisə nəticəsində ağır xəsarət alıb.

Belə ki, azyaşlının sol əli yemək hazırlanarkən ətçəkən maşında sıxılıb.

Uşağın atası İmaməli Dünyamalıyevin sözlərinə görə, həmin vaxt evdə elektrik xəttində qısaqapanma yaranıb. Valideynlər nasazlığı aradan qaldırmağa çalışarkən uşaq nəzarətsiz qalıb və əlini ətçəkən maşına salıb.

Hadisə ilə bağlı TƏBİB-ə və Fövqəladə Hallar Nazirliyinə məlumat verilib. FHN əməkdaşları xüsusi avadanlıqların köməyi ilə uşağın əlini cihazdan çıxarıblar.

Uşaq sol yuxarı ətrafının ət maşınında sıxılması nəticəsində yaranan ağır travmatik amputasiya ilə hadisədən 7 saat sonra Səhiyyə Nazirliyinin Əziz Əliyev adına Azərbaycan Dövlət Həkimləri Təkmilləşdirmə İnstitutunun Plastik və Rekonstruktiv Cərrahiyyə Klinikasına çatdırılıb. Əməliyyat təxminən 8 saat davam edib.

“Bu, vaxtla yarış tələb edən çox mürəkkəb proses idi. Uşağın işarət, orta və üzük barmaqlarını qidalandıran damarlar, eləcə də barmaqların hərəkətini təmin edən vətərlər tamamilə qopmuşdu. Hazırda vəziyyəti çox yaxşıdır. Gülür, bizimlə ünsiyyət qurur və əlini hərəkət etdirir”, – deyə əməliyyatı həyata keçirən plastik, rekonstruktiv və estetik cərrah Dilqəm Məmmədov bildirib.