Gəncədə sahibsiz itlər qorxu saçır: Sakinlər narahatdır - Baku TV

Gəncədə sahibsiz itlər ortayaşlı qadına hücum edərək ağır xəsarətlər yetirib.

Hadisə şəhərin Mikayıl Hüseynov küçəsində baş verib.

Ərazidə yaşayan sakinlər bildirirlər ki, bu, artıq sahibsiz itlərin insanlara hücumu ilə bağlı təkrarlanan hallardan biridir və itlərin sayı günü-gündən artır.

“Mən o xanımın çığırtısına qaçdım, gördüm ki, qadın yıxılıb, 15-20 it isə başına toplanıb. Bəlkə də, xanım yıxılmasa, başı dəyməsəydi, itlər onu parçalayacaqdı”, – hadisə şahidi qeyd edib.

Başqa bir sakin isə əlavə edib:

“Uşağı küçəyə çıxara bilmirik, həbsxana kimidir, evdə qalmışıq. Özümüz birtəhər gedib-gəlirik. Amma bu dəqiqə küçədə bir uşaq görmək mümkün deyil. Hara müraciət edirik, heç bir xeyri yoxdur. Gəlib iynə vurmurlar ki, artmasın”.

Məsələ ilə bağlı Gəncə Şəhər İcra Hakimiyyətindən isə bildirilib ki, şəhər ərazisində sahibsiz küçə itləri ilə bağlı ildə iki dəfə Azərbaycan Dövlət Aqrar Universitetinin Baytarlıq fakültəsində aksiya keçirilir. Aksiya çərçivəsində mütəxəssislərin iştirakı ilə sahibsiz küçə itlərinin qısırlaşdırılması həyata keçirilir. Hər aksiya zamanı orta hesabla 200-dən çox sahibsiz küçə iti prosesə cəlb olunur.