İdmançı ərini qətlə yetirən qadın haqda məhkəmə qərarını açıqladı

“Sərhədçi” idman kompleksinin kikboksinq üzrə məşqçisi Nurani Qalabəylinin qətlində ittiham olunan həyat yoldaşı Əfsanə Qalabəylinin məhkəməsi başa çatıb.

Bakı Ağır Cinayətlər Məhkəməsində hakim Səyavuş Hacıyevin sədrliyi ilə keçirilən yekun prosesdə prokuror çıxış edərək keçirilmiş ekspertiza rəyləri ilə Əfsanə Qalabəylinin cinayəti anlaqsız vəziyyətdə törətdiyini bildirib.

Hadisədən sonra onda psixi pozuntu yarandığı təsdiq edildiyini vurğulayan prokuror bu səbəbdən də məhkəməyə müttəhimin cəzadan azad edilməklə barəsində məcburi tibbi xarakterli tədbirlərin görülməsi üçün ixtisaslaşmış psixatriya stiasionarında müalicə tətbiq edilməsini təklif edib.

Hakim heyəti müşavirədən sonra hökmü elan edib. Qərara görə, Əfsanə Qalabəyli cinayəti anlaqsız vəziyyətdə törətdiyindən və hazırda psixi problemləri olduğundan cinayət məsuliyyətindən və cəzadan azad edilib. Qərar qanuni qüvvəyə mindikdən sonra müttəhim barəsində ixtisaslaşdırılmış psixiatriya stasionarlarında məcburi müalicə tətbiq ediləcək.

Qeyd edək ki, hadisə 2022-ci ilin sentyabrında Xətai rayonu ərazisində qeydə alınıb. Əfsanə Qalabəyli özündən 13 yaş böyük olan həyat yoldaşı Nurani Qalabəylini çoxsaylı bıçaq zərbələri ilə qətlə yetirib. Ona qarşı Cinayət Məcəlləsinin qəsdən adam öldürmə maddəsi ilə ittiham verilib.