İranla əlaqəli "bariqalar" ələ keçdi | Gəncədə polis basqını

Gəncədə müxtəlif yollarla ölkə ərazisinə, o cümlədən şəhərə gətirilən narkotik vasitələri satmaqda və yaymaqda şübhəli bilinən şəxslər saxlanılıb.

Daxil olan məlumat əsasında keçirilən əməliyyat-axtarış tədbirləri nəticəsində İrandan qeyri-qanuni yolla ölkəyə gətirilən narkotik vasitənin ünvana çatdırılmasını təmin etmək istəyən Samux sakini Elşən Xəlilov saxlanılıb. Onun üzərinə baxış zamanı əlindəki çantadan qara bazarda qiyməti 500 000 manata yaxın olan 14 kq 926 qram narkotik vasitə olan heroin aşkar edilib.

Digər bir əməliyyatla da külli miqdarda narkotik vasitə qanunsuz dövriyyədən çıxarılıb. Gəncə sakini Yaşar Abbasovun əlindəki çantadan 18 kq 400 qram çəkidə qurudulmuş marixuana aşkarlanıb.

Dindirilmə zamanı şübhəli şəxs narkotik vasitənin ona aid olmasını, bir müddət əvvəl gizlətdiyi yerdən götürüb Gəncəyə gətirən zaman saxlanılmasını etiraf edib.