İş adamının qohumu nədə ittiham olunur? | Detallar üzə çıxdı

Avqustun 7-də Bakının Xəzər rayonunda güllələnərək qətlə yetirilən iş adamı Amin Xudaverdiyevin qardaşı oğlu Cavidan Xudaverdiyev inzibati həbs olunub.

1988-ci il təvəllüdlü paytaxt sakini Cavidan Xudaverdiyevin saxlanılmasına səbəb isə onun əmisinin qətlə yetirildiyi yerdə meyitə yaxınlaşmaq istəməsi olub. Buna mane olan polis əməkdaşlarına müqavimət göstərməyə cəhd edən Cavidan Xudaverdiyev ünvansız söyüşlər işlədib.

Buna görə də o, Xəzər Rayon Polis İdarəsinin 1-ci polis şöbəsinə gətirilərək barəsində protokol tərtib olunmaqla rayon məhkəməsinin qərarı ilə İnzibati Xətalar Məcəlləsinin polisin qanuni tələbinə qəsdən tabe olmama maddəsi ilə 30 günlük inzibati həbs qərarı çıxarılıb.

Qeyd edək ki, qətlə yetirilən Amin Xudaverdiyevin biznes fəaliyyəti ilə məşğul olduğu, yaşadığı Mərdəkan qəsəbəsində və ətraf ərazilərdə nüfuz sahibi kimi tanındığı bildirilir. Onu qətlə yetirməkdə şübhəli bilinən həmyerlisi Ruhulla Abdullazadə saxlanılaraq istintaqa cəlb olunub.

Onun barəsində Cinayət Məcəlləsinin qəsdən adam öldürmə maddəsi ilə cinayət işi başlanıb. Hadisənin qisasçılıq zəminində törədilməsi bildirilir.