Keçmiş arvadını amansızlıqla qətlə yetirdi | Qandonduran hadisənin təfərrüatı

2023-cü il oktyabrın 26-sı saat 19:00 radələrində Tərtər rayon sakini Zamiq Tanrıverdiyev 35-ci polis bölməsinə könüllü gələrək keçmiş arvadını öldürməsi haqqında məlumat verib.

Hadisə İnqilab İsmayılov küçəsi, 15 ünvanında yerləşən gözəllik salonlarından birində baş verib. Hadisə yerindən çoxlu sayda qan ləkələri və bir ədəd qara dəstəkli bıçaq aşkar olunub.

Xətai Rayon Prokurorluğunda Cinayət Məcəlləsinin 120.1-ci maddəsi ilə cinayət işi başlanılıb. Məhkəmə-tibbi ekspertizasının rəyinə görə, Pərvanə Məhərrəmovanın ölümünə ağciyərin zədələnməsindən baş vermiş kəskin qanitirmə səbəb olub. Qanında narkotik maddələr və etil spirti aşkar edilməyib.

İstintaqla müəyyən edilib ki, Z.Tanrıverdiyev 2023-cü il oktyabrın 26-sı saat 18:30-da keçmiş arvadı Pərvanə Məhərrəmovanın dırnaq ustası işlədiyi gözəllik salonuna gəlib. Pərvanə Məhərrəmovanı yanına çağıraraq yüngül həyat tərzinə son qoymasını bildirdikdə qadın ona “get işinlə məşğul ol, öz həyatımdır, özüm bilərəm” deyib. Buna görə qisas niyyəti ilə gödəkçəsinin cibindən məişət təyinatlı bıçağı sağ əli ilə çıxarıb, müstəsna dərəcədə qəddarlıqla Pərvanə Məhərrəmovanın bədəninin müxtəlif nahiyələrinə ümumlikdə 25 dəfə zərbə endirib. Bu hərəkəti ilə Zamiq Tanrıverdiyev zərərçəkmişi xüsusi amansızlıqla qəsdən öldürüb.

Zamiq Tanrıverdiyev Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə təqsirli bilinərək Bakı Ağır Cinayətlər Məhkəməsinin hökmü ilə cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum edilib.