Külək damları uçurdu, işıqları kəsdi və can aldı

Martın 29-na keçən gecə Gürcüstanın bir sıra qərb bölgələrində güclü qasırğa fəsadlara səbəb olub, ölən və xəsarət alanlar var.

Kobuleti rayonunda minik maşınının üzərinə ağacın aşması nəticəsində bir nəfər hadisə yerində dünyasını dəyişib. Kobuletidən Tbilisiyə xəstəxanaya aparılan 6 yaşlı uşaq avtomobilin aşması nəticəsində xəsarət alıb, vəziyyətinin ağır olduğu bildirilir.

Batumi, Ozurgeti və digər bölgələrdə güclü külək nəticəsində evlərin və binaların dam örtükləri uçub. Təbii fəlakət nəticəsində avtomobillərə də ciddi ziyan dəyib. Qasırğa həmçinin elektrik xətlərini sıradan çıxarıb.

Kobuleti rayonunun Çakvi kəndində güclü külək fərdi evi dağıdıb. Dağıntılar altından çıxarılan 80 yaşlı qadın kəllə-beyin travması ilə xəstəxanaya yerləşdirilib. Təbii fəlakət nəticəsində xəsarət alanların sayı dəqiqləşdirilir.