Liftdəki faciə ilə bağlı bu şəxslər vəzifədən kənarlaşdırıldı

Paytaxtın Binəqədi rayonu, Biləcəri qəsəbəsi, Yəhya Hüseynov küçəsində bədbəxt hadisə baş verib.

Belə ki, martın 26-sı səhər saatlarında liftdə köməksiz qalan 44 yaşlı qadın aldığı xəsarətlərdən hadisə yerindəcə dünyasını dəyişib.

Hadisənin baş verdiyi bina 107 saylı Mənzil Kommunal İstismar Sahəsinin xidməti ərazisidir və onlar liftlərin təhlükəsiliyinə birbaşa cavabdehdirlər. Elə ona görədir ki, Bakı Şəhər İcra Hakimiyyətindən bildirilib ki, Binəqədi rayonunda baş verən faciə ilə bağlı sözügedən Mənzil Kommunal İstismar Sahəsinin rəisi Rüfət Süleymanov tutduğu vəzifədən azad edilib.

Üstəlik, “Bakımənzilavtomat ixtisaslaşdırılmış istehsalat” idarəsinin rəisi İlham Hüseynov və Binəqədi rayon “Mənzil Kommunal Təsərrüfat” Birliyinin rəisi Elmin Zamanov isə araşdırma müddətində vəzifələrindən kənarlaşdırılıblar.

Nəzərə alsaq ki, 2024-cü ilin ilin ilk 3 ayında 5 nəfər yararsız liftlərin qurbanı olub, onlardan 4-ü yaralanıb, 1-i isə həyatını itirib. Bu zaman sual yaranır, binalardakı liftlərə nə vaxt baxış keçirilir? Problem aşkarlandıqda hansı tədbirlər görülür?