Maşını polislərin üzərinə sürən sürücü ilə bağlı açıqlama

Sosial şəbəkələrdə "Toyata Prius" markalı avtomobilin sürücüsünün yol polisi əməkdaşlarına qarşı tabesizlik göstərməsi və maşını onların üstünə sürməsi ilə bağlı görüntülər yayımlanıb.

Paytaxtın Cəfər Xəndan küçəsində, Azadlıq prospekti istiqamətində hərəkətdə olan dövlət qeydiyyat nişansız “Toyota Prius” markalı avtomobilin sürücüsü ardıcıl olaraq qayda pozuntuları etməklə ətrafdakı insanların həyat və sağlamlığına təhlükə yaradıb.

Daxili İşlər Nazirliyindən verilən məlumata görə, Bakının Nəsimi rayonu ərazisində “Toyota Prius” markalı avtomobilin saxlanılması narkotik vasitələrin qanunsuz dövriyyəsi ilə əlaqəlidir.

“Əvvəllər Cinayət Məcəlləsinin müxtəlif maddələri ilə məhkum olunan 1987-ci il təvəllüdlü Rauf Qurbanovun idarə etdiyi avtomobildə külli miqdarda satış məqsədilə narkotik vasitələrin olması barədə polisə əməliyyat məlumatı daxil olub. Keçirilən tədbirlər zamanı polis əməkdaşlarına tabesizlik göstərən şəxsin saxlanılması DYP əməkdaşları ilə birgə təmin edilib”, – deyə nazirlikdən bildirilib. Qeyd edək ki, narkotik vasitələrin qanunsuz dövriyyəsində şübhəli bilinən R.Qurbanovun cinayət işi üzrə istintaq hərəkətləri davam etdirilir.