Özəl bağçada dərman qalmaqalı | Valideynlə müdir üz-üzə gəldi

Yasamal rayonunda yerləşən bağçalardan birində uşaqların dərmanla yatızdırıldığı deyilir.

Valideynlərin iddialarına görə, analiz zamanı uşaqların qanında həmin dərman aşkarlanıb.

Şikayətçi valideyn Elnurə Hüseynovanın sözlərinə görə, kameradan müəllimənin övladı ilə kobud rəftarını görərək bağçaya gedib:

“Orada işləyən başqa bir müəllimə mənə Aygül müəllimənin övladıma “Ketotifen” adlanan tabletin suda həll olunaraq verildiyini və sözügedən şəxs tərəfindən döyüldüyünü dedi. Bu barədə sübutlarla Daxili İşlər Nazirliyinin “102” qaynar xəttinə zəng edərək şikayət etdim”.

Bağça rəhbəri isə iddiaları təkzib edib. Onun sözlərinə görə, əslində hər şey xırda problemdən qaynaqlanıb.

“Bağçada valideynlə müəllimə arasında problem yaşanıb. Valideyn övladını bağçadan götürməyə gec gəldiyi üçün müəlliməmiz ona qarşı səsini ucaldıb. Xanım bloger olduğunu söyləyərək, müəlliməni sosial şəbəkə hesabında rüsvay edəcəyini deyib”, – deyə bağçanın müdiri İlahə Əliyeva bildirib.

Daxili İşlər Nazirliyindən verilən məlumata görə, şikayətçi Elnurə Hüseynova oktyabrın 17-də Yasamal Rayon Polis İdarəsinin 29-cu Polis Şöbəsinə ərizə ilə müraciət edərək rayon ərazisində fəaliyyət göstərən uşaq bağçasında övladının müəllim tərəfindən döyüldüyünü bildirib. Hazırda vətəndaşın müraciəti üzrə polis şöbəsində təhqiqat araşdırması aparılır. Araşdırmanın nəticəsinə əsasən müvafiq qərar qəbul ediləcək.