Qaça-qaça gəlib dedilər ki... | Tovuzda şagirdlərin zəhərlənməsinin təfərrüatları

Tovuz rayon Aşağı Quşçu kənd 1 nömrəli tam orta məktəbində tüstülənmədən zəhərlənmənin təfərrüatı məlum olub.

Məktəbin şagirdi Rəbiyə Əhmədova Baku TV-yə açıqlamasında bildirib ki, dərsdə olarkən başqa bir sinifdə sobanın partlaması səsini eşidiblər:

“Həmin sinifdəki uşaqları çölə çıxardılar. Bizim sinifimizdə tüstü yox idi. 3 sinifdən tüstü çıxandan sonra hamımızı bayıra çıxardılar. Tüstüyə görə halımız pisləşdi”.

Baş vermiş hadisə ilə bağlı danışan valideyn Şahlar Quliyev isə bildirib ki, zəhərlənən şagirdlərdən bəzilərin vəziyyəti yaxşı deyil:

“Övladım qaça-qaça gəlib dedi ki, soba partlayıb, uşaqlar tüstüdən zəhərlənib. Yaxınlıqda yaşayırıq. Gələndə gördüm ki, təcili tibbi yardım maşınları məktəbdədir. Valideynlərdən bir neçəsi ilə əlaqə saxlamışam. Deyirlər ki, uşaqların vəziyyəti qənaətbəxş deyil”.

Baş Prokurorluğun mətbuat xidmətindən verilən məlumata əsasən, Tovuz rayon Aşağı Quşçu kənd 1 nömrəli tam orta ümumtəhsil məktəbinin 2 sinfində pelet sobasının tıxanması səbəbindən tüstülünmə nəticəsində 62 nəfərin xəstəxanaya yerləşdirilməsi faktı üzrə Tovuz Rayon prokurorluğunda araşdırma aparılır.

Xəstəxanaya müraciət edən şəxslərə ilkin tibbi yardım göstərildikdən sonra onlar ambulator müalicəyə buraxılıblar, səhhətləri normaldır.