Qalmaqallı direktor barədə hansı qərar verildi? | Hadisənin təfərrüatı üzə çıxdı

Paytaxtdakı 201 nömrəli tam orta məktəbdə Bakı Şəhəri üzrə Təhsil İdarəsi tərəfindən monitorinq aparılıb.

Bu barədə Bakı Şəhəri üzrə Təhsil İdarəsi məlumat yayıb.

Bildirilib ki, monitorinq zamanı təlim-tərbiyə prosesi, tədris-pedaqoji və metodiki işin təşkili, eləcə də bir sıra digər müvafiq istiqamətlər üzrə yoxlamalar aparılıb. Monitorinq nəticəsində bir sıra nöqsanlar aşkarlanıb.

Əmək funksiyası üzrə vəzifə öhdəliklərini keyfiyyətsiz yerinə yetirdiyinə görə 201 nömrəli tam orta məktəbin direktoru Afaq Əliyevaya Əmək Məcəlləsinin 186-cı maddəsinin 2-ci hissəsinin “A” bəndinə əsasən töhmət verilib.

Xatırladaq ki, bir müddət əvvəl 201 nömrəli tam orta məktəbin direktoru Afaq Əliyevanın vəzifə səlahiyyətlərindən sui-istifadə etməsi ilə bağlı iddialar yayılmışdı. İddiaya görə, Afaq Əliyeva məktəbin müəllimi Lalə Şəfaqətovanı keçmiş direktor müavini Svetlana Hüseynovaya qarşı yalançı şahidlik etməyə vadar edib.