Qardaşım 6 gündür ortalıqda yoxdur | Kanalda batan qazinin ailəsi danışdı

Avqustun 9-u gecə saatlarında 44 günlük Vətən müharibəsi qazisi Abusət Əliyevin Samur-Abşeron kanalında batdığı bildirilib.

O, suda batarkən yanında iki şəxsin olduğu və həmin şəxslərin sudan çıxdığı iddia edilib.

Qardaşı Abusət Əliyevdən 6 gündür xəbər olmadığını bildirib:

“Maşın, həqiqətən də, kanala düşmüşdü. Qardaşımla birlikdə 3 nəfər idilər, iki nəfər çıxarılıb. Onların necə çıxarıldığı müvafiq qurumlar tərəfindən araşdırılır. Qardaşım ortalıqda yoxdur, 6 gündür səbr edirik. Fövqəladə Hallar Nazirliyinə, yerli İcra Hakimiyyətinə, “Azərsu”ya yaxınlaşıram, hamısı deyir ki, bizim nəzdimizdən çıxıb. Getmədiyimiz qurum, bölmə qalmayıb”.

O, sudan çıxan digər iki şəxsi tanımadığını qeyd edib: “O şəxsləri mən heç vaxt görməmişəm, amma iddia edirlər ki, orada yaşayırlar, qazidirlər”.

“Həyat yoldaşımın bir ayağı yoxdur, qapı-qapı düşüb oğlumuzu axtarır. Deyirlər ki, bu işə baxacağıq, amma heç nə etmirlər. Bir ana kimi ürəyim ağrıyır, uşağımı tapıb mənə verin”, – Abusət Əliyevin anası deyib.

Samur-Abşeron Kanalının İstismarı İdarəsindən bildirilib ki, hadisə baş verən gün dərhal əraziyə baxış keçirilib, texnika vasitəsilə avtomobil sudan çıxarılıb. Bir sutka ərzində suyun səviyyəsi minimum həddə endirilib. Avqustun 14-ü tarixində isə Abusət Əliyevin ailəsi ilə görüş keçirilib. Bununla bağlı müvafiq orqanlara məlumat verilib.