Qətl törədən şəxs 9 il azadlıqdan məhrum edildi

Sabunçu rayonunun Maştağa qəsəbəsində həmyerlisini qətlə yetirməkdə ittiham olunan Rəşid Babayevin məhkəməsi başa çatıb.

Bakı Ağır Cinayətlər Məhkəməsində hakim Roman Ələkbərlinin sədrliyi ilə keçirilən son iclasda hökm oxunaraq Rəşid Babayev 9 il müddətinə azadlıqdan məhrum edilib.

Xatırladaq ki, hadisə 2024-cü ilin mayında Sabunçu rayonu Maştağa qəsəbəsində baş verib. Qəsəbə sakini, 1974-cü il təvəllüdlü Roman Əsgərov kəsilmiş-deşilmiş xəsarətlə xəstəxanaya yerləşdirilib və orada həyatını itirib.

Sabunçu Rayon Polis İdarəsinin 14-cü Polis Şöbəsinin əməkdaşlarının həyata keçirdikləri əməliyyat-axtarış tədbirləri nəticəsində Roman Əsgərovu qətlə yetirməkdə şübhəli bilinən 1966-cı il təvəllüdlü həmin qəsəbənin sakini, narkotiklərlə əlaqəli cinayətlərə görə əvvəllər məhkum olunan Rəşid Babayev saxlanılıb.

İstintaq və məhkəmə araşdırmaları zamanı məlum olub ki, hadisənin baş verməsinə səbəb Roman Əskərovun sərxoş vəziyyətdə Rəşid Babayevin yaşadığı mənzilin qapısını döyməsi olub. Rəşid Babayev qapını açıb, o, zorla mənzilə girməyə cəhd edərkən ev sahibi tərəfindən bıçaqlanıb.