Qətlə yetirdiyi qadının pulunu sevgilisinə xərclədi | Bakıda dəhşətli cinayət

2021-ci il mayın 31-də polis əməkdaşları Bakıxanov qəsəbəsi, M.Fətəliyev küçəsi, ev 27, mənzil 12-də üzərində zorakılıq əlamətləri olan, boyununa elektrik naqil keçirilmiş çılpaq qadın meyiti aşkarlayıb. Araşdırmalarla həmin şəxsin Ucar rayonunda anadan olmuş 31 yaşlı Turanə Cəfərova olduğu müəyyənləşib.

Faktla bağlı Sabunçu Rayon Prokurorluğunda Cinayət Məcəlləsinin qəsdən adam öldürmə maddəsi ilə cinayət işi açılıb. Məhkəmə-tibbi ekspertizasının rəyinə görə, Turanə Cəfərovanın ölümünə boyunun sıxılması nəticəsində qansızma və mexaniki asfiksiya səbəb olub.

Cinayəti törətməkdə şübhəli bilinən Naxçıvanda doğulmuş 28 yaşlı Eynur Əlizadə saxlanılıb. İstintaqla müəyyən edilib ki, Eynur “Türkan” kimi tanıdığı Turanə Cəfərova ilə hadisədən 5 ay əvvəl “Instagram” sosial şəbəkəsində tanış olub. Mütəmadi telefonla danışıb, qadının Bakıxanov qəsəbəsində, kirayədə yaşadığı mənzildə görüşüblər. Mayın 31-i gecə saat 1 radələrində də Eynur intim münasibətdə olmaq üçün həmin evə gəlib. Aralarında olan səmimi münasibətə görə Turanə avtomobil almaq üçün çarpayının döşəyi altına yığdığı 14 700 manat pulu ona göstərdikdən sonra qadını öldürmək qərarına gəlib.

Məhkəmə iclasında Eynur Əlizadə ittiham üzrə özünü qismən təqsirli bilib. Bakı Ağır Cinayətlər Məhkəməsinin hökmü ilə o, cəzasını ciddi rejimli cəzaçəkmə müəssisəsində çəkməklə 18 il müddətinə azadlıqdan məhrum edilib.