Naxçıvanda dəhşətli hadisə | Ahıl qadın xəsarət aldı - Baku TV

Naxçıvanda qəsdən adam öldürməyə cəhd faktı ilə bağlı cinayət işi başlanılıb.

Sədərək rayonunun Dəmirçi kənd sakini, 1963-cü il təvəllüdlü Aləmzar Abbasova bədənin müxtəlif dərəcəli xəsarətləri ilə Naxçıvan Muxtar Respublika Xəstəxanasına yerləşdirilib.

Faktla bağlı qadının həyat yoldaşı, 1957-ci il təvəllüdlü Zakir Abbasov şübhəli şəxs qismində saxlanılıb.

Naxçıvan Muxtar Respublika Xəstəxanasının həkimi Azər Məmmədovun verdiyi məlumata görə, Aləmzar Abbasova ailə-məişət zəminində həyat yoldaşı tərəfindən döyülüb və ağır vəziyyətdə xəstəxananın Reanimasiya şöbəsinə yerləşdirilib:

“Xəstənin ümumi vəziyyəti ağır olaraq qiymətləndirilir. Ona kəllə-beyin travması, baş beyin əzilməsi, üz sümüklərinin sınığı, eləcə də bədənin müxtəlif nahiyələrinin kəsilmiş-deşilmiş yaraları diaqnozu qoyulub. Hazırda Reanimasiya şöbəsində müalicəsi davam etdirilir”.