Qız uşaqları onun dərsində ağlayır | Suraxanıdakı məktəbdə nə baş verib?

Suraxanı rayonu, 316 nömrəli tam orta məktəbdə çalışan müəllim Mehman Qurbanlının şagirdlərə qarşı qeyri-etik və zorakı davranışlar sərgilədiyi iddia olunur.

Deyilənlərə görə, müəllim dərs zamanı şagirdləri dəyənəklə döyür, psixoloji təzyiqlər göstərir.

“Dərsi başa düşmədim, o da saçımı yoldu. Axır-əvvəl başa düşəndə saçımı buraxdı”, ‒ deyə məktəbli bildirib.

Məsələ ilə bağlı açıqlama verən Mehman Qurbanlı haqqında deyilənləri inkar edib.

“Müəllimlər mənə şikayət edirdilər ki, uşaqlar dərslərdə özlərini yaxşı aparmırlar, mən də onları tərbiyələndirmişəm. Uşaqları döyməmişəm, sadəcə xətkeşi masanın üzərinə vurmuşam. Uşaq dərsdə özünü yaxşı apara bilmirsə, sinif rəhbəri müəyyən tədbirlər görməlidir”, ‒ deyə o qeyd edib.

Məsələ ilə bağlı 316 nömrəli tam orta məktəbdən bildirilib ki, riyaziyyat müəlliminin dərs prosesini pozan şagirdlərə iradını bildirməsinə dair yayılan səs yazısı ilə əlaqədar araşdırma aparılıb.

Məlum olub ki, müəllimin rəhbərlik etdiyi sinifdə bir neçə şagirdin uyğunsuz davranışı digər pedaqoqları da qane etmir. Araşdırma zamanı müəllimin şagirdlərə fiziki təzyiq göstərmədiyi, digər şagirdlərin təhsil hüququnu pozduqlarına, tədris prosesinə maneçilik törətdiklərinə, dərsə məsuliyyətsiz yanaşdıqlarına görə onları tənbeh etdiyi məlum olub.

Həmin uşaqların valideynləri ilə məktəbdə görüş keçiriləcək. Məktəb rəhbərliyi qeyd olunan sinfə nəzarəti artıracaq. Həmçinin psixoloqun uşaqlarla bağlı dəstəkləyici tədbirlər aparması qərara alınıb.