"Hamısını kəsib-doğrayıblar, üstünü də torpaqla..." | "Ağ Şəhər” ərazisində nə baş verib? - Baku TV

Xətai rayonu, Süleyman Vəzirov küçəsindəki çoxillik həmişəyaşıl ağacların kəsilməsi sakinlər arasında narazılığa səbəb olub.

Onların dediklərinə görə, təxminən 50 ağac bir gecədə naməlum səbəbdən kəsilib. Ərazidə nə inşa ediləcəyinə dair isə heç bir məlumat verilməyib.

“Burada 50 illik ağaclar var idi, təxminən əlli ədəd. Bazar günü səhər gördük ki, ağacların hamısını kəsiblər, hətta gövdələrin izlərini də itiriblər, üstünü torpaqla örtüblər. Ərazini müşahidə edərkən böyük miqdarda budaq qırıntılarını görmək olur. Park etmək əvəzinə bir gecənin içində ağacların soyqırımını etdilər”, – sakinlərdən biri narazılığını dilə gətirib.

Məsələ ilə bağlı Daxili İşlər Nazirliyindən bildirilib ki, ağac kəsilməsi faktı üzrə Xətai Rayon Polis İdarəsində Cinayət Məcəlləsinin müvafiq maddəsi ilə cinayət işi başlanılıb. Həmin əməli törətməkdə şübhəli bilinən iki nəfər saxlanılaraq məsuliyyətə cəlb olunub.

Ekologiya və Təbii Sərvətlər Nazirliyindən isə qeyd edilib ki, sözügedən ərazidə ağacların ağır texnika ilə məhv edildiyi müəyyən edilib. Faktla bağlı akt tərtib olunub. Təbiətə dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış materiallar Azərbaycan Respublikasının Baş Prokurorluğuna göndərilməsi üçün hazırlanır.