"Şantaj etmək üçün səbəb..." | "Tiktoker Beniz”in məhkəməsində nələr yaşandı?

Sevgi münasibətində olduğu iş adamı Xalid Kərimovun hədə-qorxu ilə bir milyon manata yaxın pulunu ələ keçirməkdə təqsirləndirilən tiktoker Aybəniz Xəlilovanın məhkəmə prosesi keçirilib.

Bakı Ağır Cinayətlər Məhkəməsində hakim Fəxri Məmmədovun sədrliyi ilə proses yenidən başlayıb. Buna səbəb hakimlərdən biri – Anar Sadıqovun öz ərizəsi ilə istefa verməsidir. Məhkəmə Hüquq Şurası istefanı qəbul edib.

Qeyd edək ki, Anar Sadıqovun hakimlik fəaliyyətinə də xitam verilib. Bu səbəbdən yenidən başlanan prosesdə təqsirləndirilən şəxsin anket məlumatları dəqiqləşdirilib. Prokuror Tural Yaqubov ittiham aktını bir daha elan edib. Təqsirləndirilən Aybəniz Xəlilova ona elan olunan ittiham üzrə özünü təqsirli bilməyib.

Onun sözlərinə görə, ittihamda yazılanların heç biri baş verməyib.

Aybəniz Xəlilova ifadəsində bildirib ki, ittihamda şantaj yolu ilə ələ keçirdiyi yazılan ev onun öz adına olub:

"Şantaj və hədə-qorxu halları olmayıb. Ev mənim özüm üçün aldığım evdir. Zərərçəkmişlə aramızda elə problem olmayıb ki, şantaja səbəb yaratsın. Özəl günlərdə mənə ev hədiyyə alıb. İki il gözəl ailə münasibəti yaşamışıq. O mənə çox gözəl baxıb, hər şeylə təmin edib. Mənim hədə-qorxu etməyə səbəbim belə olmayıb. Kartıma pul atıb, çünki ailəsi olduğum üçün məni o dolandırıb".

Qeyd edək ki, "Beniz" ləqəbli tiktokerin barəsində sevgilisi Xalid Kərimov Suraxanı Rayon Polis İdarəsinə şikayət edib. Şikayətçi ərizəsində göstərib ki, Aybəniz Xəlilova ondan hissə-hissə olmaqla 836 min manat pul tələb edib. Tiktoker barəsində Cinayət Məcəlləsinin müvafiq maddələri ilə cinayət işi başlanıb. Daha sonra Suraxanı Rayon Məhkəməsinin qərarı ilə həbs qətimkan tədbiri seçilib.