Ruhi xəstə baba, nənə və nəvəni bıçaqladı

Şəmkirdə bıçaqlanma hadisəsi baş verib. Hadisə şəhərin Habil Əliyev küçəsində qeydə alınıb.

55 yaşlı Natiq Abbasov, onun həyat yoldaşı 51 yaşlı Sevda Abbasova və ailənin nəvəsi 9 yaşlı Xədicə Abbasova bıçaqlanma diaqnozu ilə xəstəxanaya yerləşdirilib. Onlardan iki nəfərə (qadın) zəruri tibbi xidmət göstərilib, ambulator müalicə üçün evə buraxılıblar. Bir nəfərin (kişi) döş qəfəsinin arxa divarının açıq yarası diaqnozu ilə müalicəsi tibb müəssisəsində davam etdirilir. Vəziyyəti stabildir.

Qeyd edək ki, hadisə yerinə polis əməkdaşları cəlb olunub. Aparılan araşdırmalar nəticəsində qeyd olunan şəxslərə xəsarətlər yetirməkdə şübhəli bilinən qonşuları, dəfələrlə ruhi-əsəb dispanserində müalicə almış 1990-cı il təvəllüdlü Fuad Məmmədov saxlanılıb. Faktla bağlı araşdırmalar davam etdirilir.