Sabiq icra başçısının oğlu Babəli Babayevin məhkəməsi keçirildi | Hakim nə qərar verdi? - Baku TV

Sabiq icra başçısı Lütvəli Babayevin oğlu Babəli Babayevin külli miqdarda pulunu dələduzluq yolu ilə mənimsəyən şəxslər – sabiq baş həkim Aruz Əliyev və tanışı Ehtiram Kərimovun cinayət işi üzrə növbəti məhkəmə iclası keçirilib.

Oxu.Az-ın məlumatına görə, Bakı Ağır Cinayətlər Məhkəməsinin hakimi Mahirə Kərimovanın sədrliyi ilə keçirilən iclasda zərərçəkənin vəkili vəsatət verərək məhkəmənin qapalı keçirilməsini istəyib.

Buna səbəb kimi mediada həqiqətləri əks etdirməyən məlumatların və sosial şəbəkələrdə təhqiredici ifadələrin yer alması, bunun isə ailəsinə mənfi təsir etməsi göstərilib. Vəsatət təmin edilməyib.

Daha sonra şahid kimi dindirilən sabiq icra başçısı Lütvəli Babayev ilkin istintaqda verdiyi ifadəni təsdiqlədiyini deyərək təqsirləndirilən Aruz Əliyev və Ehtiram Kərimovun ən ağır cəzaya məhkum edilməsini məhkəmədən istəyib. Müdafiə vəkilləri təqsirləndirilən şəxslərin ev dustaqlığına buraxılması ilə bağlı vəsatət qaldırıblar. Məhkəmə bu vəsatəti də təmin etməyib.

Növbəti proses yanvarın 15-nə təyin edilib.