Sabunçuda məşhur modelyerin atasını qətlə yetirənlər hakim qarşısında | Yeni detallar

Bakı Ağır Cinayətlər Məhkəməsində tanınmış modelyer Elnarə Bəkirovanın atası Kamran Bəkirovun qətlində təqsirləndirilən Mustafa Zeynalov və Namiq Əliyevin cinayət işi üzrə məhkəmənin növbəti baxış iclası keçirilib.

Hakim Mahirə Kərimovanın sədrliyi ilə baş tutan prosesdə təqsirləndirilən Mustafa Zeynalovun ifadəsi araşdırılıb. Onun ibtidai istintaq zamanı verdiyi ifadəsini məhkəmə zamanı inkar etməsi müxtəlif ziddiyətlərə səbəb olub.

Bunlardan biri iş adamı Kamran Bəkirovun qətlə yetirilməsi anı ilə bağlıdır. Təqsirləndirilən Mustafa Zeynalov ibtidai istintaqa Kamran Bəkirovun avtomobildə mübahisə zamanı arxa oturacaqda oturan qohumu Namiq Əliyev tərəfindən başına şampan şüşəsi ilə zərbə endirilərək qətlə yetirildiyini deyib. Məhkəmədə isə o, istintaqdakı ifadəsindən boyun qaçıraraq Kamran Bəkirovu şəxsən özü şampan şüşəsi ilə alnından iki zərbə endirərək qətlə yetirdiyini bildirib. Mustafa Zeynalovun bu söylədiklərini isə zərərçəkən tərəf uydurma kimi qəbul edərək bu addımı digər təqsirləndirilən Namiq Əliyevin məsuliyyətini azaltmaq cəhdi kimi qiymətləndiriblər.

Proses martın 7-də təqsirləndirilən şəxslərin ifadələrinin müzakirəsi ilə davam etdiriləcək.