Tanınmış modelyerin atasının qatilləri hakim qarşısında | Məhkəmədə nələr yaşandı?

Tanınmış modelyer Elnarə Bəkirovanın atası, iş adamı Kamran Bəkirovu qətlə yetirməkdə təqsirləndirilənlər – Mustafa Zeynalov və Namiq Əliyevin cinayət işinin məhkəmə istintaqı yekunlaşıb.

Bakı Ağır Cinayətlər Məhkəməsinin hakimi Mahirə Kərimovanın sədrliyi ilə keçirilən prosesdə dövlət ittihamçısı hər iki şəxsin təqsirinin sübuta yetirilməsini əsas gətirərək onların hər birinin 20 il azadlıqdan məhrum edilməsini məhkəməyə təklif edib.

Hakim heyəti müşavirədən qayıtdıqdan sonra təqsirləndirilənlərə son söz verilib. Mustafa Zeynalov qətlə yetirilən Kamran Bəkirovun ailəsindən üzr istəyərək təqsirkar olduğunu bildirib. Bununla yanaşı, o, məhkəmə heyətinə “mənə elə cəza verin ki, həbsxanada ölməyim” sözlərini deyib.

Bundan sonra hökm elan edilərək Mustafa Zeynalov və Namiq Əliyev hər biri 19 il azadlıqdan məhrum edilib.

Qeyd edək ki, hadisə 2024-cü ilin aprelin 6-da Bakının Sabunçu rayonu, Nardaran qəsəbəsi, “Ləhic bağları” yaşayış massivində baş verib. 70 yaşlı iş adamı Kamran Bəkirovun üzərində olan 300 min manatla itkin düşməsi barədə polisə məlumat daxil olub.

Keçirilən əməliyyat-axtarış tədbirləri nəticəsində həmin şəxsin öldürülməsi və meyitinin gizlədilməsi məlum olub. Cinayət əməlini törətməkdə şübhəli bilinən əvvəllər məhkum olunmuş 71 yaşlı Mustafa Zeynalov və 40 yaşlı Namiq Əliyev saxlanılıblar.

İstintaqla onların külli miqdarda pul vəsaitini ələ keçirmək məqsədilə Kamran Bəkirovu xüsusi amansızlıqla qəsdən öldürmələri, daha sonra meyiti su quyusuna atmaları və həmin pulu ələ keçirmələrinə əsaslı şübhələr müəyyən edilib.

Onu da qeyd edək ki, təqsirləndirilən Mustafa Zeynalov əvvəllər polis orqanlarında çalışıb.