Sakinlərə yalan vədlər verən qadın məhkəmə zalında qandallandı | Ağlasığmaz dələduzluğun təfərrüatı

Paytaxtda sakinlərin bir milyon manatdan artıq pulunu mənimsəməkdə təqsirləndirilən Tənzilə Kərimovanın cinayət işinin məhkəmə istintaqı yekunlaşıb.

Bakı Ağır Cinayətlər Məhkəməsində hakim Eldar İsmayılovun sədrliyi ilə keçirilən son prosesdə hökm oxunaraq Tənzilə Kərimova 10 il müddətinə azadlıqdan məhrum olunub. Onun barəsində həbs qətimkan tədbirinin seçilməsi ilə bağlı qərar çıxarılaraq məhkəmə zalında həbs olunub.

Qeyd edək ki, Tənzilə Kərimova "Qat" sistemi adlı onlayn şəbəkə oyununa cəlb etdiyi 81 nəfərdən hesabına köçürülən 1 232 559 manatı mənimsəməkdə təqsirləndirilib.

Araşdırmalarla məlum olub ki, Tənzilə Kərimova həmin oyunlara müəyyən iştirakçıları qalib kimi seçərək onları şirnikləndirmək üçün əlavə ödənişlər edib. Onlayn şəbəkə oyununun 11 qrup rəhbəri olub və təşkilatçısı bu şəxslərin heç birini tanımayıb.

Bununla yanaşı, oyunun qaydalarından bəlli olub ki, 500 manat ödəyən ilkin olaraq 2500 manat alsa da, hesablar sonradan dondurulub.

Zərərçəkənlərin əksəriyyəti isə qadınlar olub. Onların bir neçəsi ilkin olaraq müəyyən qazanc əldə etsələr də, sonradan hesablarına yatırılan depozitlərin kəsildiyini görüb və bu barədə Daxili İşlər Nazirliyinə müraciət ediblər.

Nazirliyin Kibercinayətkarlıqla Mübarizə Baş İdarəsi tərəfindən keçirilən əməliyyat zamanı Tənzilə Kərimova barəsində Cinayət Məcəlləsinin 178.4-cü (dələduzluq − xüsusilə külli miqdarda törədildikdə) maddəsi ilə ittiham irəli sürülərək istintaqa cəlb olunub.