Tanınmış modelin işi ilə bağlı yeni xəbər | Qalmaqallı hadisənin detalları

Raziyyat Əliyevanı döyərək xəsarət yetirməkdə təqsirləndirilən iş adamı Ziya Hüseynzadənin cinayət işinin məhkəmə istintaqı yenidən araşdırılır.

Cinayət işinin məhkəmə istintaqı növbəti dəfə Bakı Ağır Cinayətlər Məhkəməsinə yeni təyinat almış hakim Roman Ələkbərlinin sədrliyi ilə araşdırılacaq.

Xatırladaq ki, məlum cinayət işinin yeni tərkibdə araşdırılmasına səbəb daha öncə prosesə sədrlik edən Bakı Ağır Cinayətlər Məhkəməsinin hakimi Səyavuş Hacıyevin dünyasını dəyişməsidir.

Qeyd edək ki, sözügedən cinayət işi mərhum hakimin rəhbərliyi altında 2023-cü ilin yanvarından araşdırılırdı.

İttiham aktında qeyd olunur ki, model Raziyyat (Razi) Əliyevanın üzərindəki xəsarətlərlə bağlı sosial şəbəkələrdə yayılan görüntülər araşdırılarkən həmin hadisənin 2023-cü ilin mayın 26-da baş verdiyi müəyyənləşdirilib.

İddia olunub ki, Ziya Hüseynzadə Raziyyat Əliyevanın Lökbatan qəsəbəsində anasına məxsus mənzilində nalayiq ifadələr səsləndirib, zor tətbiq edərək giriş qapısını zədələyib.

2017-ci ildə Azərbaycan gözəli seçilmiş model Raziyyat Əliyeva iddia edir ki, sevgilisi olmuş Ziya Hüseynzadə ona və ailəsinə qarşı zorakı hərəkətlər edib, onların ünvanına təhqir və təhdid xarakterli ifadələr səsləndirib.

Ziya Hüseynzadə Cinayət Məcəlləsinin 133 (əzab vermə), 177.3 (oğurluq – yaşayış sahəsinə, habelə binaya, anbara və ya başqa saxlanc yerlərinə qanunsuz daxil olmaqla törədildikdə), 182.3.2 (hədə-qorxu yolu ilə tələb etmə), 186 (əmlakı qəsdən məhvetmə və ya zədələmə), 221.1 (xuliqanlıq) və başqa maddələr ilə ittiham olunur.

Xatırladaq ki, Ziya Hüseynzadə biznes fəaliyyəti ilə məşğul olub. O, “PKF Audit Azerbaijan” MMC-yə rəhbərlik edir.